Notum sit omnibus fidelibus, tam futuris quam presentibus, quod ego Wigo, Dei indultu, oppidi Albionis comes, capellam de Muracio et ecclesiam Sancti Pręjecti, que sita est in Cumbis, omniaque ad illas intus vel foris pertinentia [cum] vineis, terris, pratis, aquis et silvis, culta et inculta, quę huc usque jure hereditario posidere videor, beatorum apostolorum Petri et Pauli ecclesię Cluniacensi, ad locum Mantuę, cui donnus abba Ugo non tam preesse quam prodesse videtur, pro remedio animę meę parentumque meorum, in posterum abendum concedo, et in potestatem ipsius predicti Ugonis abbatis transfundo. Si quis autem huic meę oblationi in aliquo contradixerit, æterni regis iram incurrat, et in igne diabolo et angelis ejus preparato sine fine ardeat. Facio autem hoc astipulacione et auctoramento fratris mei Guigonis, cognomento Raimundi, Richardi, Armannique, qui per me tenere videbantur, parentumque eorum et ali[or]um legalium virorum meorum, quorum hęc sunt nomina: Gosfredus de Murencio, Artaldus de Roscilione, Bermundus de Orel, Atenus de Toli, Eitur de Cassanalio, Antelmus de Muracio, Elisiardus, Garnerius. Anno ab incarnacione Domini nostri Jesu Christi millesimo septuagessimo nono, indictione II^a.